काठमाडौं महानगरकाे टुँडिखेलमा सीप मेला तालिम लिन ४३ हजार ५८ जना आवेदन

काठमाडौं महानगरपालिकाले सञ्चालन टुँडिखेलमा चलिरहको सीप मेलाका लागि मात्रै ४३ हजार ५८ जनाले आवेदन दिएको महानगरले जनाएको छ ।

२०८१ जनालाई तालिम दिने र तालिम दिएकालाई रोजगार दिने लक्ष्यसहित वैशाख १९ गतेदेखि सुरु भएको मेलामा निशुल्क तालिम लिन ईच्छुकका लागि महानगरले आवेदन आह्वान गरेको थियो । टुँडिखेलमा चलिरहेको सीप मेलामा विभिन्न १० क्षेत्रका ३० वटा विधामा सीप तालिम दिइरहेको छ ।

महानगर गौरव योजनाअन्तर्गत चालु आर्थिक वर्षमा १५ हजार जनलाई निःशुल्क तालिम दिने र तालिम लिएकामध्ये ५ हजार जनलाई रोजगार वा स्वरोजगारमा आवद्ध गराउने लक्ष्य रहेको सहरी योजना आयोगका सदस्य इञ्जिनियर शैलेन्द्र झाले जानकारी दिए । उनले तालिमका लागि अनलाइन फर्मबाट आवेदन लिइरहेको सुनाए ।

‘यस्ता आवेदकहरुलाई नाम थर, मोवाइल नम्बर, नागरिकता नम्बर, ठेगाना जस्ता सूचकका आधारमा एकजनालाई एउटै मात्र तालिमका लागि छान्छौँ’, आयोगका सदस्य इञ्जिनियर शैलेन्द्र झालेले भने ।

शैलेन्द्रका अनुसार हरेक वडाबाट १०० जनालाई सहभागी गराउन फाराम पठाइएको थियो । सीप मेलाका लागि पनि सुरुमा अनलाइन आवेदनमात्रै लिने भनिएको थियो । तर धेरै संख्यामा आवेदकहरुले मेलास्थानमै फारम भर्न पाउने माग गरेकाले उनीहरुको मागबमोजिम टुँडिखेलमै फाराम भर्ने अवसर दिइएको महानगरले जनाएको छ ।

सीप मेलाको अन्तिम २ दिन रोजगार मेला पनि हुनेछ‍‍‌ । यस दिन रोजगारदाता स्टलमै आउने र तालिम लिएकाहरुलाई छनोट गरेर रोजगारी दिने महानगरले जनाएको छ ।

‘यही ठाउँबाट धेरै बेरोजगारले रोजगार पाउन सक्नु हुनेछ । रोजगारदाताले सिपयुक्त जनशक्ति प्राप्त गर्नुहुनेछ’, महानगरले भनेको छ ।

Loading...